Glisch malgrad tut

Nadal ha liug.

Tut ei auter – quasi tut. Nadal ha liug. Ina sbrenzla speronza, in radi glisch. Perquei che tschiel e tiara ein s’avischinai cu in affon ei naschius avon varga 2000 onns. Senza tetg, senza schurmetg. Ei dat nuot da romantisar. E tuttina eis ei glisch. Nies mund tegn en il flad, denton igl affon flada pasch. Nus giavischein a Vus in legreivel Nadal!

«Glisch malgrad tut» unescha en las baselgias dalla Svizra carstgauns, che vulan festivar quei particular Nadal 2021 a moda speciala : sin vias, en casas, en las baselgias, en loghens che negin havess spitgau, digitalmein. « Glisch malgrad tut » s’avischina al pursepen e scuviera novums. Nadal ha liug, auter, spess, profund. «Glisch malgrad tut» vul springer steilas.

sterne

Nadal 2021 el modus da crisa: Ei po dar che Vus essas en curontina, forsa essas Vus sezs malsauns. Vus essas forsa en cordoli pervia d’in car carstgaun. Stuer sur meins ora organisar lavur, famiglia e relaziuns, quei si e giu incontin ha stunclentau Vus. Da buca pli saver ir en sortida ei dir. Cun Vossa paga da lavur cuorta vegnis Vus mo vessamein sur las rundas. La tema da piarder Vossa lavur, da stuer serrar Vies menaschi schai profundamein en Vus. San ins festivar aschia Nadal?

Igl ei pusseivel da far Nadal. Perquei che tschiel e tiara ein setuccai cu aunghels han empleniu cun lur glisch la paupradad dalla stalla. Quei muenta carstgauns tochen sil di dad oz. Quella glisch duei era curdar sin Vus, mussar a Vus ina via e regalar a Vus fidonza. Pertgei quei affon flada pasch. Per Vus. Per tuts Vos cars. Per quei mund senza flad.

waldfondue

Nadal giuado

Ir giuado! Passar cun musicists atras la vias, affons e teatrists fan da cuminonza il giug d’encurir ina casa d’albiert. Festivar communablamein egl uaul, tedlar entuorn in fiug la historia da Nadal, magliar ina fondue sur il fiug. Sin Cadruvi stat in pigniel cun giavischs per Nadal ed auters Give-aways per prender cun ins. Cantar sil balcun allas 18.00 uras cugl entir quartier «Clara notg». Purtar a carstgauns agl ur dalla societad in punsch. Regalar cauld. Esser da cuminonza aschi bein sco quei va cun tener distanza.

zoom

Esser colligiai digitalmein

In Zoom Call cun amitgs ell‘Australia, cun la famiglia ell’Italia. Mirar il video d’aunghels dils Kids e scriver ils giavischs per Nadal el Chat. Era las supplicas per quels senza lavur. Tschentar ensemen ina playlist cun canzuns da Nadal ord tut il mund, far viva avon la televisiun. Envidar via Zoom jasters ed amitgs en curontina ad in survetsch «divin@home». Formular tier in’enconuschenta melodia da Nadal in text per quei onn special e tschentar quel ella reit.

krippe-neu

Festivar a casa

Sco adina: Cuschinar, far pettas e tustgets, far uorden, ornar il pigniel, tschentar si la stalla. Encurir e stampar el Google la historia da Nadal en ina buna translaziun. Salidar sin finiastra dunnas ed umens ed affons che van en baselgia. Sez urar e cantar. Tgei ei auter en quella notg? Leger la veglia historia da Maria e Giusep cun lur affon. Ponderar tgi che jeu less sez esser sche jeu savess esser ella stalla. Magliar ina tscheina da Nadal en pintga cuminonza. Tschentar damondas: Nua e co serealisescha Nadal oz? Co festiveschan ils carstgauns en perschun? Dessert: In dessert dultsch-amar regorda vid la veta e la notg ch’ei aschi speciala. Finiziun: Tschentar sin parsiel finiastra ina candeila che ardeva sin meisa.

Co va «Glisch malgrad tut»? Fetg sempel: Vus sescheis inspirar dalla nuviala da Nadal. Leu ein carstgauns semplamein semess sin via. Els han encuretg ina via, els han scuvretg enzatgei niev. Aschia va Nadal era oz. Semettei cun auters sin via, empruei, seigies creativs.

Vies messadi dalla glisch da Nadal colligies Vus cun ils Visuals che stattan a disposiziun gratuitamein sut «Downloads»: format da medias socialas, A4 ed A3. Nus vegnin a colligiar per link varga in tozzel interessants projects! Seigies creativs cun derasar Good News da Nadal.

strahlen-dunkel

Nadal 2021 vegn festivau
— semplamein auter.